काठमाडौं- पछिल्लो २४ घण्टाको अवधिमा १३ जना कोरोना संक्रमित निको भएर डिस्चार्ज भएका छन् ।

स्वास्थ्य तथा जनसंख्या मन्त्रालयले नियमित लाइभ अपडेटमा पछिल्लो २४ घण्टामा १३ जना कोरोना संक्रमित निको भएर अस्पतालबाट डिस्चार्ज भएको जानकारी दिएको हो ।

योसँगै हालसम्म निको हुनेको संख्या  २१९ पुगेको छ । जसमा १७२ जना पुरुष र ४७ महिला रहेका छन् ।

मन्त्रालयका अनुसार काठमाडौंको बलम्बुस्थित सशस्त्र प्रहरी अस्पतालको आइसोलेसनमा रहेका कोरोना संक्रमितमध्ये ११ जना निको भएका छन्। डिस्चार्ज हुनेमा मकवानपुरका ७ वर्षीय बालक, भक्तपुर नगरपालिका-५ का ४२ वर्षीय पुरुष, एक डाक्टर र एक नर्स पनि छन्।

मन्त्रालयका अनुसार हालसम्म ५३ जिल्लामा कोरोना भाइरसको संक्रमण फैलिएको छ ।

स्वास्थ्य मन्त्रालयका अनुसार हालसम्म पीसीआर विधिबाट ६६ हजार ७२९ जनाको कोरोना परीक्षण गरिएको छ । जसमध्य पछिल्लो २४ घण्टामा पीसीआर विधिबाट २५७५ जनाको परीक्षण गरिएको मन्त्रालयले जानकारी दिएको छ ।