हङकङ– नयाँ सुपुर्दगी कानूनको विरोध गर्दै हङ्कङमा हजारौँले प्रदर्शन गरेका छन् । हङ्कङले हालै प्रस्ताव गरेको नयाँ सुपुर्दगी कानूनले अन्तर्राष्ट्रिय व्यापारिक केन्द्रको रुपमा रहेको हङ्कङको छवि बिग्रिने र त्यसले व्यक्तिगत स्वतन्त्रताको हनन् गर्ने भन्दै त्यसविरुद्ध प्रदर्शन भएको हो ।

प्रदर्शनमा १२ हजारभन्दा धेरैको सहभागिता रहेको आयोजकले जनाएका छन् । यद्यपि सुरक्षा अधिकारीले भने प्रदर्शनमा ५२ सय जनाजति सहभागी रहेको जनाएका छन् ।

गत फेब्रुअरीमा सार्वजनिक गरी शुक्रबार प्रस्ताव गरिएको नयाँ सुपुर्दगी कानून अनुसार हङ्कङका प्रमुखलाई त्यहाँको वर्तमान न्यायिक व्यवस्था विपरित अन्य स्थानमा अभियोग लागेर हङ्कङमा बसोबास गर्दै आएका मानिसलाई चीन र ताइवानसहित हङ्कङको न्यायिक अधिकार क्षेत्र बाहिर पनि सुपुर्दगी गर्न सक्ने कार्यकारी अधिकार दिइएको छ ।

आलोचकहरुले यो कानूनले व्यक्तिगत स्वतन्त्रताको हनन् हुने आरोप लगाउँदै आएका छन् । यता त्यहाँको सरकारले भने त्यस कानूनलाई आवश्यक संशोधन र परिमार्जन गर्न बाँकी नै रहेको भन्दै त्यसलाई आगामी बुधबार परिमार्जन र संशोधनका लागि प्रस्ताव गरिने जनाएको छ ।

यद्यपि हङ्कङका विपक्षी विधायक तथा मानवअधिकारकर्मीहरुले नयाँ कानूनलाई मुख्यभूमि चीनको सत्तारुढ कम्युनिष्ट पार्टीले आफ्ना विरोधीलाई दबाउनका लागि दुरुपयोग गर्नसक्ने र कानूनले हङ्कङको न्यायिक स्वतन्त्रता खतरामा पर्नसक्ने चिन्ता व्यक्त गर्दै आएका छन् ।

हङ्कङले त्यहाँ बसोबास गर्दै आएका चीनविरोधी नेतालाई पक्राउ गरी चीनलाई सुपुर्दगी गरेमा त्यहाँ उनीहरुलाई यातना दिइने, उनीहरुको मानवअधिकार हनन् हुनसक्ने चिन्ता व्यक्त हुँदै आएका छन् ।