काठमाडौं– स्वास्थ्य मन्त्रालयले नेपालमा कोरोना भाइरसको जोखिम रोक्न भारतबाट आउनेहरुलाई हेल्थ किट उपलब्ध गराउने जनाएको छ ।

स्वास्थ्य मन्त्रालयका प्रवक्ता डा विकास देवकोटाले भारतबाट आउनेहरुलाई सरकारले हेल्थ किट उपलब्ध गराउने जानकारी दिएका हुन् ।

डा देवकोटाका अनुसार भारतबाट नेपाल प्रवेशको क्रम नरोकिएकोले उनीहरुका लागि मास्क, स्यानीटाइजर, थर्माेमिटर लगायतका हेल्थ किट उपलब्ध गराउन लागिएको हो ।

डा देवकोटाका अनुसार स्वास्थ्य सेवा विभागले केही दिनमा सिमानाकामा प्रवेश गर्नेलाई हेल्थ किट उपलब्ध गराउने बताए । उनले भारतबाट आउनेहरुको संख्या बढ्दै गएकाले क्वारेन्टाइनमा रहँदा व्यवस्थित भएर रहना पनि आग्रह गरे ।

नेपालमा क्वारेन्टाइमा रहनेको संख्या बढ्दै गएको डा देवकोटाको भनाइ छ । उनका अनुसार थप क्वारेन्टाइन व्यवस्थापन गर्न स्थानीय, प्रदेश र संघीय सरकारले समन्वय गर्नुपर्ने बताए ।

उनले कोरोना संक्रमणलाई जित्न सबैजना एकजुट भएर लाग्नुपर्ने बताए । डा देवकोटाले समुदायमा कोरोना संक्रमण फैलिदै जाँदा ज्येष्ठ नागरिक तथा दीर्घ रोगीलाई बढी जोखिम हुने भएपनि आफ्नो स्वास्थ्यप्रति सबैजना सचेत रहनुपर्ने बताए ।