चीन– चीनको एक रासायनिक कारखानामा विष्फोट हुँदा ७ जनाको ज्यान गएको छ । पूर्वी चीनको जिङ्साउ प्रान्तमा रहेको रासायनिक कारखानामा विष्फोट हुँदा अरु ५ जना घाइते भएको चिनियाँ अधिकारीले जनाएका छन् ।

जिङ्साउ प्रान्तको कुन्शान शहरमा रहेको कुन्शान वाफर टेक्नोलोजी लिमिटेडको कारखानामा विष्फोट भएको हो । ताइवानमा मुख्यालय रहेको म्याग्नेसियम र एलुमुनियमका सामग्रीहरु निर्माण गर्ने वाफर कम्पनीको कारखानामा विष्फोट हुनुको कारणबारे अनुसन्धान भइरहेको चिनियाँ अधिकारीले जनाएका छन् ।

कारखानामा रहेको धातु जडान गर्ने स्थानबाहिर विष्फोटन भएको बताइएको छ । विष्फोटनको कारणबारे अनुसन्धान भइरहेको जनाइएको छ । साङ्घाई शहरबाट ७० किलोमिटर पश्चिममा रहेको कुन्शान शहरमा एक हजारभन्दा धेरै ताइवानी कम्पनीहरु सञ्चालनमा छन् ।

यसअघि मार्च २१ मा चीनकै अर्को रासायनिक कारखानामा विष्फोट हुँदा ७८ जनाको ज्यान गएको थियो । चीनमा यस्ता औद्योगिक दुर्घटनामा परी हरेक वर्ष सयौँले ज्यान गुमाउने गरेका छन् ।