काठमाडौं – कोरोना भाइरसको संकटबाट गुज्रिरहेको फिलिपिन्सलाई सहानुभूति दर्शाउन चीनले चालेको कुटनीतिक चाल प्रत्युत्पादक भएको छ ।

मनिलास्थित चिनियाँ राजदूतावासले कोरोना भाइरसको महामारीमा पनि फिलिपिन्समा अग्रपंक्तिमा रहेर काम गरिरहेका श्रमिकहरूलाई समर्पण गर्दै सार्वजनिक गरेको म्यूजिक भिडियोले समस्या सृजना गरेको छ ।

२३ अप्रिलमा जारी गरिएको उक्त म्यूजिक भिडियोमा प्रयोग गरिएको शब्द ‘आइसाङ डागत’ (एक समद्री क्षेत्र) लाई अप्रत्यक्षरूपमा दक्षिण चीन सागर भएको उल्लेख गरेपछि फिलिपिनोहरू रिसाएका हुन् ।

फिलिपिन्सका स्थानीयले म्यूजिक भिडियोमा उल्लेखित क्षेत्रलाई पश्चिमी फिलिपिनी सागर मान्दै आएका बेला मनिलास्थित चिनियाँ राजदूत एचई हुवाङ सिलियानले लेखेका शब्दहरुलाई म्यूजिक भिडियो बनाउदा भने दक्षिण चीन सागरसँग जोडिएको छ ।

उक्त म्यूजिक भिडियो बनाउदा चिनियाँ र फिलिपिनो नागरिकलाई प्रस्तुत गरिए पनि जनआक्रोश बढेपछि म्यूजिक भिडियो लाइक गर्ने भन्दा डिसलाइक गर्नेको संख्या कयौं गुणा बढी देखिएको छ ।