काठमाडौं – चीनमा काेराेना भाइरस महामारी फैलिन शुरु भएयता पहिलाे  पटक शनिबार एक जना पनि सङ्क्रमित

थपिएका छैनन् । चीनमा पछिल्लाे २४ घण्टामा नयाँ सङ्क्रमण नदेखिएपछि संक्रमण दर शून्यमा झरेको दाबी गरिएको छ ।

चीनमा आहिले एक जना पनि कोरोनाभाइरसबाट सङ्क्रमित नभेटिएको अधिकारीहरुले जनाएका हुन् । दुई जना भने शंकास्पद देखिएका छन् ।

चीनको राष्ट्रिय स्वास्थ्य आयोगले नयाँ विरामी नभेटिए पनि अहिले ७९ जना सङ्क्रमितको उपचार भइरहेको जनाएको छ । चीनमा अहिलेसम्म ८२ हजार ९७१ जना सङ्क्रमित भएका छन् भने ४ हजार ६३४ जनाको कोरोनाभाइरसका कारण मृत्यु भएको छ ।

गएकाे वर्षकाे अन्त्यतिर चीनकाे वुहान शहरबाट नै सङ्क्रमण सुरु भएकाे थियाे र त्यसकाे केही महिनामा नै पूरै विश्व महामारीकाे चपेटामा परेको छ ।

तर मार्च महिनाबाट चीनमा सङ्क्रमण हुने दरमा निकै कमी आयाे, यसाे हुनुमा प्रतिबन्धकाे कडा रुपमा पालना गर्नुलाई प्रमुख कारण मानिएकाे छ । यता समाचार एजेन्सी राेयटर्सका अनुसार चीनमा बाहिरबाट आएका मानिसमा सङ्क्रमण देखिने क्रम बढिरहेकाे छ । तीमध्ये धेरैजसाे यस्ता चिनियाँ नागरिक छन्, जाे विदेशबाट फर्किरहेका छन् ।

कोरोना भाइरसको उद्गमविन्दु वुहानमा पनि याे महिना पहिलाे पटक केही इलाकामा सङ्क्रमण देखिएकाे थियाे । वुहानमा गएकाे अप्रिल ८ तारिखमा लकडाउन हटाइएकाे थियाे ।

हाल चीनमा एक जनामा पनि संक्रमण नदेखिए पनि सामाजिक दूरी कायम गरी अन्य आर्थिक तथा सामाजिक गतिविधिहरु थालिएका छन् । चीनका शैक्षिक संस्थाहरु पनि खुल्न थालिसकेका छन् ।