काठमाडौं- गत बिहीबार कालीमाटी तरकारी बजारमा गरिएको कोरोना परीक्षण सबैको रिपोर्ट नेगेटिभ आएको छ ।

स्वास्थ्य सेवा विभाग अन्तर्गतको इपिडिमियोलोजी तथा रोग नियन्त्रण महाशाखा र राष्ट्रिय जनस्वास्थ्य प्रयोगशालाका चिकित्सक र स्वास्थ्यकर्मीको टिमले नमुना संकलन गरेको थियो ।

जसमा ७ सय जनाको आरडीटी र ३ सय ३४ जनाको पीसीआर परीक्षण गरिएको थियो ।

कालीमाटीमा कोरोना पीसीआर र आरडीटी एक हजार ३४ जनाकै रिपोर्ट नेगेटिभ आएको इपिडिमियोलोजी तथा रोग नियन्त्रण महाशाखाका निर्देशक डा. बासुदेब पाण्डेले जानकारी दिए । उनले भने “गत बिहीबार कालीमाटीमा लिएको नमुनाको सबैको रिपोर्ट नेगेटिभ आएको छ ।”

त्यसैगरी इपिडिमियोलोजी तथा रोग नियन्त्रण महाशाखाका निर्देशक डा. पाण्डेकाअनुसार गत शुक्रबार टेकुमा महानगरका सफाई कर्मचारीलगायतका ७ सय ३१ जनाको नमुना संकलन गरिएको थियो । जसमा आरडीटीमा केहीको पोजेटिभ देखिएको थियो पुनः पीसीआर परीक्षण गर्दा नेगेटिभ रिपोर्ट आएको राष्ट्रिय जनस्वास्थ्य प्रयोगशालाले जानकारी दिएको उनले बताए ।

काठमाडौं उपत्यकामा संक्रमण बढ्न थालेपछि स्वास्थ्य तथा जनसंख्या मन्त्रालयले उपत्यकामा गत बिहीबार परीक्षण सुरु गरेको थियो ।