काठमाडौं- काठमाडौं महानगरपालिकाले शुक्रवार वातावरण व्यवस्था विभागको कार्यालय टेकुमा कोरोना भाइरसको परीक्षण शुरु गरेको छ ।

काठमाडौं महानरभित्र फोहोरमैला व्यवस्थापनमा खटिने करीब ८ सय जना कर्मचारीको र्‍यापिड डाइन्गोष्टिक (आरडीटी) पोलिमेयर चेन रियाक्सन (पीसीआर) विधिबाट कोरोना परीक्षण गरिरहेको महानगरका जनस्वास्थ शाखाका प्रमुख नरेन्द्र बज्रचार्यले जानकारी दिए ।

बज्रचार्यका अनुसार काठमाडौं महानगरपालिका, स्वास्थ्य सेवा विभागको सम्वन्यम इपिडियोमोलोजी तथा रोग नियन्त्रण महाशाखा र राष्ट्रिय जनस्वास्थ्य प्रयोगशालाका प्राविधिक स्वास्थ्यकर्मीहरुले कोरोना परीक्षण गराइरहेका छन् ।

‘परीक्षणका लागि लाइनमा बसेका पहिलो व्यक्तिमा पीसीआर विधिबाट र दोस्रो, तेस्रो र चौथो व्यक्तिलाई आरडीटीबाट कोरोना परीक्षण गराइएको छ’ उनले भने, ‘त्यस्तै पाचौं व्यक्तिलाई पीसीआर विधिबाट परीक्षण गरेको र यसैगरी ८ सय जनाको परीक्षण गराउन लागेका छौं ।’

महानगरले बिहीवार कालीमाटी फलफूल तथा तरकारी बजारमा एक हजार ३४ जनाको कोरोना परीक्षण गरेको थियो । जसमा आरडीटीबाट परीक्षण गराएका ४ जनाको भने कोरोना पोजेटिभ देखिएको थियो ।

आरडीटीमा पोजेटिभ देखिएसँगै महानगरले तत्काल पीसीआर विधिबाट परीक्षण गराएको थियो । त्यसको रिपोर्ट आउन बाँकी छ ।