काठमाडौं- नारायणी अस्पतालमा आइसोलेसनमा रहेका दुईजना संक्रमति अस्पतालबाट भागेका छन् ।

नारायणी अस्पतालका एक चिकित्सकका अनुसार हिजो संक्रमण पुष्टि भइ राति ९ बजे अस्पतालको आइसोलेसनमा भर्ना भएका दुईजना संक्रमति आज भागेका हुन् ।

उनीहरु स्वास्थ्य मन्त्रालयले हिजो दिउँसो संक्रमण पुष्टि गरेको पर्साका २९ जना मध्येका दुईजना हुन् ।

राजनाथ यादव र असरफ हवारी नाम गरेका दुईजना संक्रमित आइसोलेसनबाटै भागेको अस्पतालका एक चिकित्सकले बताए ।

जिल्ला प्रहरी कार्यालय पर्साका डिएसपी वीरेन्द्रबहादुर शाहीका अनुसार अस्पतालबाट भागेका दुवै संक्रमितको खोजीका लागि प्रहरी परिचालन गरिएको छ ।

डिएसपी शाहीले भने, अस्पतालले केही समय अघि दुईजना संक्रमित अस्पतालबाटै भागेको खबर गरेपछि अहिले हामीले प्रहरी परिचालन गरेर उनीहरुको व्यापक रुपमा खोजी कार्य थालिसकेका छौं ।