काठमाडौं– स्वास्थ्य तथा जनसंख्या मन्त्रालयका अनुसार नेपालमा कोरोना भाइरसको संक्रमण देखिएका कूल संक्रमित १ सय ९१ जनामध्ये सबैभन्दा बढी पुरुष रहेका छन् ।

स्वास्थ्य मन्त्रालयका प्रवक्ता डाक्टर विकास देवकोटाका अनुसार कुल संक्रमित मध्ये १ सय ५८ जना पुरुष र ३३ जना महिला रहेका छन् ।

प्रवक्ता डा देवकोटाले मंगलबार संक्रमण पुष्टि भएका कपिलवस्तुमा ८ जना, रुपन्देहीमा ९ जना, पर्सामा ३९ जना र बारामा एक जना सहित ५७ नयाँ संक्रमित थपिएसँगै कुल संक्रमितको संख्या १ य ९१ पुगेको बताए ।

मंगलबार संक्रमण पुष्टि भएका नयाँ संक्रमितहरुलाई  विभिन्न अस्पतालको आइसोलेसन वार्डमा लगिँदै छ । यस्तै यसअघि नै संक्रमण देखिएकामध्ये वीरगञ्जमा २७, राजविराजमा १, विराटनगरमा १९,रुपन्देहीमा २८, भरतपुरमा १, नेपालगञ्जमा २४ र र वर्दियामा १ जना गरी १ सय ३ जना आइसोलेसन रहेका छन् ।

प्रवक्ता देवकोटाका अनुसार पीसीआर विधिबाट हालसम्म १८ हजार ९ सय ६४ र आरडीटी विधिबाट ५९ हजार ६ सय २७ परीक्षण भएको छ । यस्तै गत २४ घण्टामा थप २ हजार २ सय ३६ वटा नमूना परीक्षण भएको छ ।

प्रवक्ता डाक्टर देवकोटाका अनुसार विभिन्न प्रदेशमा संक्रमित र आशंका गरीएका व्यक्ति सहित २ सय २८ जना रहेका छन् ।

प्रवक्ता डा देवकोटालेअनुसार काठमाडौं उपत्यकामा १ जना र उपत्यका बाहिर २ सय २७ जना आइसोलेसनमा रहेका छन् । उनका अनुसार प्रदेश १ मा २५ जना आइसोलेसनमा रहेका छन् । जसमध्ये १९ जना संक्रमित र ६ जना आशंका गरिएका बिरामी रहेका छन् ।

यस्तै प्रदेश २ मा ८० जना आइसोलेसनमा रहेका छन् जसमध्ये संक्रमित ६८ र आशंका गरीएका १२ जना छन् । यस्तै बागमती प्रदेशमा २५ जना आइसोलेसनमा रहेका छन् जसमध्ये आशंका गरिएका २४ र एकजना संक्रमित छन् । यस्तै प्रदेश नम्बर ५ मा ९८ जना आइसोलेसमा रहेकोमा २८ जना आशंका गरीएका र ७० जना संक्रमित रहेका छन् ।

यस्तै देशभरका क्वारेन्टाइमा १२ हजार ७ सय ८५ जना रहेका छन् ।