काठमाडौं – स्पेनिस फूटबल लिग ला लिगाका शीर्ष क्लवका पाँच खेलाडीमा कोरोना भाइरसको संक्रमण देखिएको छ ।

कुन क्लवका कुन/कुन खेलाडीलाई कोरोना भाइरसको संक्रमण भएको हो भन्नेबारे अहिलेसम्म गोप्य राखिएको छ ।

संक्रमित पाँचै जना खेलाडीलाई आइसोलेसनमा राखिएको छ । उनीहरूको नियमित परीक्षण गरिने र लगातार दुई परीक्षणमा नेगेटिभ नतिजा आएपछि मात्र ट्रेनिङमा सामेल हुन पाउनेछन्।

आगमी जुनबाट ला लिगा शुरू गर्ने तयारी भइरहेका बेला क्लबहरूले ट्रेनिङ शुरू गर्नुअघि परीक्षण गर्दा उनीहरूमा कोरोना भाइरसको संक्रमण देखिएको हो ।

स्पेनमा बिना दर्शक बन्द रंगशालामा खेल शुरू गर्ने तयारी भइरहेको छ।

त्यसैको तयारीस्वरुप शीर्ष स्थानका बार्सिलोनासहित ला लिगाका विभिन्न क्लबका खेलाडीहरुले ट्रेनिङ शुरू गरेका छन्।