मंगलसेन– अछामबाट हेलिकोप्टरमार्फत उद्धार गरी उपचारका लागि नेपागञ्ज रेफर गरिएकी सुत्केरीको मृत्यु भएको छ ।

अत्याधिक रक्तश्राव भएपछि रेफर गरिएकी रामारोशन गाउँपालिका, भटाकाटियाकी २४ वर्षीया देउमा साउँदको कोहलपुर मेडिकल कलेजमा मृत्यु भएको हो ।

२५ दिन अघि भटाकाटिया स्वास्थ्य चौकीमा सुत्केरी भएकी उनलाई पेटको दुखाई बढेपछि शनिबार बयलपाटा अस्पताल पुर्‍याइएको थियो । उपचारका क्रममा सुत्केरीको पेटमा अत्याधिक रक्तश्राव भएको पाइएपछि तत्काल अप्रेशन गर्नु पर्ने भएकाले कोहलपुर मेडिकल अस्पतालमा रिफर गरिएको थियो ।

तर, कोहलपुर मेडिकल कलेजमा शल्यक्रिया नहुँदै उनको मृत्यु भएको श्रीमान् मान बहादुर साउँदले जानकारी दिएका छन् ।