काठमाडौं – नोबेल कोरोना भाइरस (कोभिड १९) को जोखिमबाट मुक्त हुँदै गएको जर्मनले खेलकुद गतिविधिका लागि अनुमति दिएको एक हप्तापछि बुन्डेसलिगा २ को एक क्लबका सबै खेलाडीलाई आइसोलेसनमा राखिएको छ ।

जर्मनको दोस्रो डिभिजन क्लब डाएनामो रेस्डनको पुरा टिमलाई आइसोलेसनमा राखिएको छ । दुई जना खेलाडीमा कोरोना भाइरसको संक्रमण देखिएपछि रेस्डनका सम्पूर्ण खेलाडिसहित प्रशिक्षकलाई दुई हप्ताका लागि आइसोलेसनमा राखिएको बीबीसीले उल्लेख गरेको छ ।

बुन्डेसलिगाका शीर्ष दुई लिग मे १६ देखि शुरु गर्ने तयारी भइरहेको थियो । कोरोना भाइरसका कारण रोकिएका लिगमध्ये पुनरागमन गर्ने पहिलो युरोपिन लिग पनि बुन्डेसलिगा नै हो ।

जर्मन फुटबल एसोसियसन (डिएफएल) ले लिग कडा स्वास्थ्य निगानिकाबीच शूरु हुने र आवश्यक पर्दा खेलाडीहरुको कोरोना परिक्षण गरिने बताएको छ । यस्तै, लिग भने दर्शक विना सुरू हुनेछ । खेल निर्देशिकामा खेलको दिन रंगशालामा ३ सय जनाभन्दा बढी हुन छैनन् । मार्च १३ देखि रोकिएको लिग आउँदो आइतबारबाट सुरू हुँदैछ ।