एजेन्सी- फ्रान्स तथा पेरिस सेन्ट जर्मेन (पीएसजी)का युवा स्टार केलियन एमबाप्पेलाई फ्रेन्च लिग वानको गोल्डेन बुट प्रदान गरिएको छ ।

एमकाप्पेले लगातार दोस्रो सिजन फ्रेन्च पलग वानको गोल्डेन बुट जित्न सफल भएका हुन् । कोरोना भाइरस (कोभिड–१९)का कारण सिजन रद्द भएसँगै लिग डि फुटबल प्रोफेसनल (एलएफपी)ले पीएसजीलाई नै अघिल्लो साता च्याम्पियन घोषणा गरेको थियो ।

फ्रान्स सरकारले आगमी सेप्टेम्बरसम्म खेलकुदका कुनै पनि गतिविधि गर्न रोक लगाएपछि एलएफपीले लिग वान र लिग टु रद्द भएको घोषणा गरेको थियो ।

२१ वर्षे एमबाप्पेले अघिल्लो सिजन पनि गोल्डेन बुट जितेका थिए । उनले अघिल्लो सिजन २९ खेलमा ३३ गोल गरेका थिए । यो सिजन फ्रान्स तथा मोनाकोका विसाम बिन यडरसँग समान १८ गोल भए पनि प्रतिखेलमा गोलको आधारमा एमबाप्पेलाई गोल्डेन बुट प्रदान गरिएको हो ।

विश्व विजेता एमबाप्पेले यडरको तुलनामा ओपन प्लेबाट बढी गोल गरेका थिए । यडरको १८ गोलमा तीन पेनाल्टी समावेश छ । जब कि एमबाप्पेले सबै गोल ओपन स्पेसबाटै गरेका छन् ।

यस्तै, एमबाप्पे यडरको तुलनामा प्रतिखेलमा बढी गोल गर्नमा पनि अघि छ । उनले लिग वानको २० मध्ये १८ खेलमा गोल गरेका छन् । यडरले २६ खेलमा १८ गोल गर्न सफल भएका थिए । एमबाप्पेको प्रतिखेल ०.९ रहँदा यडरको ०.६९ रहेको छ । एमबाप्पेले यो सिजन पीएसजीका लागि ३० खेलमा ३३ गोल गरेका छन् ।

पछिल्लो समय एमबाप्पेले पीएसजी छाड्ने चर्चा सुरु भएको छ । उनलाई स्पेनिस क्लब रियल मड्रिडले अनुबन्ध गर्ने प्रयास गरिरहेका छन् । तर, कोरोनाका कारण हुन सक्ने आर्थिक मन्दीलाई ध्यानमा राख्दै रियलले अर्को सिजन मात्रै अनुबन्ध गर्ने बुझिएको छ ।

यता, एमबाप्पेले पनि पीएसजीसँग आफ्नो रिलिज क्लज मागेका छन् । उनले आफ्नो भविष्य सुनिश्चिताका लागि रिलिज क्लज माग गरिएको बुझिएको छ ।