कञ्चनपुर- भीमदत्त नगरपालिकामा लकडाउन पालना गराउन ड्रोन गस्ती शुरु गरिएको छ । भीमदत्त नगरपालिकाका १९ वटै वडामा ड्रोन गस्ती गरी लकडाउनको निगरानी बढाइएको छ ।

रोबोटिक एशोसिएशन आफ नेपाल इञ्जिनीरिङ र नगरापलिकाबीच लकडाउन निगरानीका लागि ड्रोन गस्ती गर्ने सम्झौता अनुसार आजदेखि ड्रोन गस्ती शुरु गरिएको हो ।

नगर प्रमुख सुरेन्द्र विष्टले नगर क्षेत्रमा लकडाउन पालनाको अवस्थाबारे जानकारी लिन ड्रोन गस्ती शुरु गरिएको बताए । उनले लकडाउन उल्लङ्घन गरिएको पाइएमा तत्कालै निर्देशनसमेत दिइने बताए ।

कोरोना भाइरस रोकथामका लागि पूरै नगर लकडाउन गरिएको छ । नगरपालिकामा लकडाउन पालना भए नभएको के छ भनेर ड्रोनबाट जानकारी लिन शुरु गरिएको नगर प्रमुख विष्टले जानकारी दिए ।

उनले भने , “कही कतै उल्लङ्घन गरिएको पाइएमा तत्काल पालना गराउन निर्देशनसमेत दिन्छौँ ।”

ड्रोन गस्तीका आधारमा लकडाउन पालनालाई प्रभावकारी बनाउन स्थानीय प्रशासनसित सहकार्य र समन्वयको कार्य गरिएको नगर प्रमुख विष्टले बताए ।

गस्तीका क्रममा नगरपालिकाका कुनै स्थानमा भीडभाड देखिएमा ड्रोनबाटै हट्न निर्देशन दिइने र सूचना प्रवाहसमेत गरिने भएको छ ।

रोबोटिक एशोसिएशन आफ नेपाल इञ्जिनीरिङका सुदूरपश्चिम शाखाका अध्यक्ष दीपक विष्टले नगरपालिकासित गरिएको सम्झौताअनुसार ड्रोन गस्ती गरी लकडाउनको अवस्थाबारे जानकारी लिने कार्य थालिएको बताए ।

नेपालमै पहिलोपटक भीमदत्तमा ड्रोनबाट लकडाउन निगरानी गरिएको छ । ड्रोन गस्तीबाट लकडाउन निगरानीमा सुदूरपश्चिमाञ्चल विश्वविद्यालय इञ्जिनीयरिङ सङ्कायका विद्यार्थीले समेत सहयोग गरेका छन् ।

सुदूरपश्चिमाञ्चल विश्वविद्यालयका इञ्जिनीयरिङ सङ्कायका विद्यार्थी लोचन कार्कीले ड्रोन गस्तीले नगरपालिकामा लकडाउन पालना प्रभावकारी बनाउन सहयोग पुग्ने बताउनुभयो । नगरपालिकामा पाँच दिनसम्म ड्रोन गस्ती गरिनेछ ।