काठमाडौं- सत्तारुढ दल नेकपाका संसदीय दलका उपनेता सुवास नेम्वाङले सरकारले समाजवादी पार्टीका सांसद अपहरणको घटनाबारे यथार्थ जानकारी संसदमा गराउनु पर्ने बताएका छन् ।

शुक्रबार संसदको बजेट अधिवेशन प्रारम्भ भएको अवसरमा प्रतिनिधि सभामा नेम्वाङले सांसदको अपहरणबारे यथार्थ संसदले थाहा पाउनु पर्ने बताएका हुन् ।

‘सांसदको अपहरण हुनुहुन्न। भएको के हो। यथार्थ के हो संसद चल्दा यथार्थ आउँछ भन्ने विश्वास छ,’ नेम्वाङले भने, ‘हामी कुनै आपराधिक कार्यको पक्षमा छैनौं।’

त्यसअघि प्रमुख प्रतिपक्षी दल नेपाली कांग्रेसका सभापति शेरबहादुर देउवाले सरकार अधिनायकवादी शैलीमा अघि बढ्दै सांसद अपहरणमा लागेको आरोप लगाएका थिए ।

समाजवादी पार्टीका सांसद सुरेन्द्र यादवलाई नेकपाका दुई सांसद महेश श्रेष्ठ, कृष्णकुमार श्रेष्ठ र पूर्वआइजिपी सर्वेन्द्र खनालले अपहरण गरेको आरोप लगाउँदै आएको छ ।