काठमाडौं –  अमेरिकापछि कोरोना भाइरसको सबैभन्दा धेरै संक्रमण देखिएको स्पेनमा एकै दिन ३ हजार १२१ जना कोरोना भाइरसका संक्रमित थपिएका छन् ।

संक्रमितको संख्या घट्दो क्रममा रहेको स्पनेमा फेरि ३ हजारभन्दा बढी संक्रमित देखिएका हुन् ।

योसँगै त्यहाँ संक्रमित हुनेको कुल संख्या २ लाख ५३ हजार ६८२ पुगेको छ ।

पछिल्लो २४ घण्टामा कोरोना भाइरसले त्यहाँ २४४ जनाको मृत्यु भएको छ । कुल मृतकको संख्या २५ हजार ८५७ पुगेको छ ।

यसअघि स्पेनमा मंगलबार १८५ जनाको मृत्यु भएको थियो भने २ हजार २६० जना नयाँ संक्रमित थपिएका थिए । १ लाख ५९ हजार ३५९ जना उपचारपछि निको भएका छन् ।

६८ हजार ४६६ जना उपचाररत छन् । त्यसमध्ये २ हजार ७७ जनाको अवस्था गम्भीर रहेको स्पेनका स्वास्थ्य अधिकारीहरुले जनाएका छन् ।