काठमाडौं– प्रधानमन्त्री केपी शर्मा ओलीले कम्युनिस्ट सरकारका कारण लगानी आएन भन्नेहरुलाई लगानी सम्मेलनले जवाफ दिने बताएका छन् ।

विहीबार राजधानीमा नेपाल कम्युनिस्ट पार्टी(नेकपा)को प्रदेश नम्बर तीनको बैठकलाई सम्बोधन गर्दै प्रधानमन्त्री ओलीले विपक्षीले लगानी आएन भनिरहेको भन्दै उनीहरुलाई लगानी सम्मेलनले जवाफ दिने बताए ।

‘उद्योगधन्दा बेचेर खानेहरुले नै कम्युनिस्ट सरकार भएका कारण लगानी आएन भनिरहेका छन्’ ओलीले भने,‘उनीहरुलाई लगानी सम्मेलनले जवाफ दिन्छ ।’

स्थायी सरकार र सरकारले प्रत्याभूत गरेको सुशासनका कारण विदेशी लगानीकर्ताहरु नेपालमा लगानी गर्न आकर्षित रहेको प्रधानमन्त्री ओलीको दाबी छ ।

प्रधानमन्त्री ओलीले सरकार सकारात्मक बाटोमा हिँडेका कारण विकास र समृद्धि चाडैं हासिल हुने दाबी गरे । नेकपाका अध्यक्षसमेत रहेका प्रधानमन्त्री केपी शर्मा ओलीले पार्टी एकताको बाँकी काम चाडैं सकिने बताए ।

विखण्डनको पक्षमा रहेकाहरुलाई मूलधारको राजनीतिमा ल्याएको र हिंसा हत्या मच्चाउने विरुद्ध सरकार कडा रुपमा प्रस्तुत भएको भन्दै प्रधानमन्त्री ओलीले हिंसा र अपराधलाई सरकारले सहन नसक्ने बताए ।