काठमाडौं – नेपाल कम्युनिष्ट पार्टी नेकपा नेता प्रभु साहले पार्टीलाई अन्तरिम विधान बमोजिम दुई पक्षको सहमतिमा अगाडि बढाउनुपर्ने बताएका छन् ।

तत्कालिन नेकपा (एमाले) र नेकपा (माओवादी) मिलेर बनेर नेपाल कम्युनिष्ट पार्टी (नेकपा) बने पनि फरक-फरक विचार र विरासत बोकेको दुई पार्टीबीच भएको एकता एकीकृत विचार, संगठन र नेतृत्व निर्माण संक्रमणकालीन अवस्थामा रहेकाले विधान र सहमति दुबै पछ्याउन जरुरी रहेको उनको भनाई छ ।

संक्रमणकालीन अवस्था आफैँमा संवेदनशील एवं विशिष्ट भएकाले संगठन सञ्चालन सामान्य र परम्परागत विधिबाट सम्भव नहुँने उनको जिकिर छ ।

अल्पमत र बहुमतसहितको परम्परागत विधिको माग गर्ने यथास्थितिवादी पक्षधर र नेतृत्व, विचार र संगठनमा अलग-अलग अस्तित्व कायम रहेकाले त्यसको व्यवस्थापन महाधिवेशनबाट नभइन्जेल सहमतिमा चल्नुपर्छ भन्ने पक्षधरबीच विवाद भएको बताउँदै उनले तत्कालका लागि विधान र सहमति दुबैलाई अंगिकार गरेर अघि बढ्नु पर्ने बताएका हुन् ।

पार्टीभित्रकै केहि पुरातन यथास्थितिवादी नेताहरुले मूल नेतृत्वलाई प्रभावमा पारी आन्तरिक विवाद निवारणका लागि गलत ढंगले पार्टीको विभिन्न कमिटीलगायत संसदीय दलमासमेत अल्पमत र बहुमतको परम्परागत अंकगणितीय विधिबाट निर्णय लिन खोजेको उनको आरोप छ ।

यावत गतिविधी आम जनभावना तथा पार्टी एकताको मर्म र भावना विपरीत भएको बताउँदै साहले अबको स्थायी समिति बैठकमा यस विषयमा विशेष ध्यान दिन नेताहरुलाई आग्रह गरेका छन् ।