काठमाडौं– स्वास्थ्य तथा जनसंख्या मन्त्रालयका प्रवक्ता डाक्टर विकास देवकोटाले मानिसको शरीरमा छर्किने किटनाशक रसायनले मानिसलाई कोरोना भाइरसमुक्त गराउन नसक्ने बताएका छन् ।

सोमबार स्वास्थ्य मन्त्रालयको नियमित पत्रकार सम्मेलनमा बोल्दै मन्त्रालयका प्रवक्ता डा देवकोटाले मानिसको शरीरमा किटनाशक झोल प्रयोग गरेर कोरोना भाइरस नष्ट नहुने बताएका हुन् ।

डाक्टर देवकोटाका अनुसार सोडियम हाइड्रोक्लोराइ र क्लोरिनको झोल पानीमा मिसायर शरीरमा छर्किँदा कोरोना भाइरस मर्दैन । कोरोना भाइरस मानिसको शरीरभित्र कोषमा हुने भएकाले शरीरमा किटनाशक झोल स्प्रे गर्नु स्वास्थ्यका लागि हानिकारण हुने देवकोटाले बताए ।

उक्त किटनाशक रसायनले आँखा, मुख नाकमा असर गर्ने र त्यसको गलत प्रयोगले श्वासप्रश्वाससम्बन्धी समस्या आउने डा देवकोटाको भनाइ छ । उनका अनुसार रसायनहरुलाई सही तरिकाले मिश्रण गरी कोरोना संक्रमित क्षेत्रमा भूइँ, सवारीसाधान, मानिसले प्रयोग गर्ने वस्तुहरुमा भने प्रयोग गर्न सकिन्छ ।

किटनाशक रसायन स्प्रे गर्दा बाहिरी शतहमा रहेको कोरोना भाइरस मात्र नष्ट गर्न सकिने भएकाले मानिसले कोरोना संक्रमणबाट बच्न साबुनपानीले हात धुनु नै उपयुक्त हुने डा देवकोटाले बताए ।