काठमाडौं –  मुलुकमा जारी लकडाउन र अन्तर्राष्ट्रिय हवाई आवागमनमा प्रतिबन्ध लगाइदा पनि राष्ट्रिय ध्वजावाहक नेपाल वायुसेवा निगम (नेपाल एयरलाइन्स) ले भने अन्तर्राष्ट्रिय गन्तव्यमा चाटर्ड र कार्गो उडान जारी राखेको छ ।

लकडाउनको अवधिमा सर्वाधिक उडान गरेको नेपाल एयरलाइन्सले भारत, बङ्गलादेश, जापान र अष्ट्रेलियामा चाटर्ड उडान गरेको छ भने चीनको ग्वान्जाओमा चार कार्गो उडान गरेको छ ।

निगमले अझै पनि अष्ट्रेलिया, दक्षिण कोरिया र चीनको बेइजिङमा चाटर्ड उडान गर्दैछ । निगमले अष्ट्रेलिया र चीनमा फेरि उडान गर्न लागेको हो ।

आगामी वैशाख २४ गते (६ मे २०२० मा) निगमले अष्ट्रेलियाको सिड्नीमा चाटर्ड उडान गर्न लागेको जनाएको छ ।

निगमका प्रवक्ता अर्चना खड्काले नेपालमा रहेका अष्ट्रेलियाली नागरिक लिएर निगमको वाइडबडी जहाजले सिड्नी उडान गर्ने निश्चित भएको  जानकारी दिइन् । निगमले यसअघि चैत १९ गते अष्ट्रेलियाको ब्रिश्वेनमा चाटर्ड उडान गरेको थियो ।

निगमका प्रवक्ता खड्काका अनुसार काठमाडौँ – सिड्नी साढे १२ घण्टाको उडान हुनेछ । काठमाडौँबाट २५० भन्दा बढी यात्रु लिएर जाने वाइडबडी फर्कदा लोड कम हुने भएकाले सिधा सिड्नी–काठमाडौँ उडानको तालिका रहेको छ ।

निगमले वैशाख २४ गते नै चीनको बेइजिङमा कार्गो उडान गर्ने भएको छ । निजी व्यवसायीले अत्यावश्यक स्वास्थ्य सामग्री ल्याउन निगमको वाइडबडी जहाज चाटर्ड  गरेको बताइएको छ ।

निगमको जहाज काठमाडौँबाट साँझ ५ बजेर ३० मिनेटमा बेइजिङ उडेर भोलिपल्ट फर्कनेछ । यस्तै निगमले दक्षिण कोरियामा पनि चाटर्ड उडान गर्दैछ । दक्षिण कोरियाको सिओलमा गत अप्रिल ३० तारिखमा चाटर्ड उडान गर्ने भनिए पनि उडान सरेको थियो ।

दक्षिण कोरियाको सिओल उडान गर्ने निश्चित भए पनि कुन मितिमा गर्ने भन्ने यकिन भइनसकेको निगमले उल्लेख गरेको छ ।

नेपाली कामदारलाई दक्षिण कोरिया लैजान गैरआवासीय नेपाली सङ्घ कोरियाले जहाज चाटर्ड गरेर लैजान लागेको जनाइएको छ । काठमाडौँ विमानस्थलबाट कोरियाको सिओलस्थित इङचोन अन्तर्राष्ट्रिय विमानस्थलमा उडान हुनेछ ।