काठमाडौं- संघीय समाजवादीसँग एकता गरेको राष्ट्रिय जनता पार्टी(राजपा)ले केन्द्रीय सदस्यहरुको हस्ताक्षर संकलन गरिरहेको छ ।

वैशाख १० गते मध्यरातमा समाजवादी पार्टी र राजपाबीच एकता भएर जनता समाजावादी पार्टी गठन भएको थियो ।

पार्टी एकीकरण भएको सहमतिबारे निर्वाचन आयोगलाई जानकारी गराइएको थियो ।

नयाँ पार्टी दर्ता प्रकृयालाई अघि बढाउनका लागि कागजपत्ररु आयोगमा बुझाउन आवश्यक हुन्छ ।  त्यसका लागि आ आफ्ना दलका केन्द्रिय समितिको सहमति र निर्णय लगायतका आवश्यक कुराहरुको व्यवस्थापनका लागि यतिबेला राजपा सक्रिय बनेको हो ।

राजपाका संयोजक शरदसिंह भण्डारीका अनुसार जतिसक्दो चाँडो दर्ता प्रकृयामा जानका लागि केन्द्रीय सदस्यहरुको हस्ताक्षर संकलन भइरहेको हो ।

पार्टी एकताका लागि भएको सैद्धान्तिक सहमतिलाई केन्द्रीय सदस्यहरुलाई जानकारी गराइसकेको उनले बताए ।

संयोजक भण्डारीका अनुसार अध्यक्ष मण्डलले राजपा र समाजवादीबीच एकता गर्ने सैद्धान्तिक सहमतिलाई अनुमोदन गरेको छ ।
‘वैशाख १६ गते अध्यक्षमण्डलको बैठकले पार्टी एकताको सहमतिलाई अनुमोदन गरेको छ अब बाँकी रहेका काममा हामी केन्द्रित भएका हौं,’s उनले भने ।