काठमाडौं – रेडियो नेपालकी प्रथम गायिका रानुदेवी अधिकारीको निधन भएको छ । प्रजातन्त्र सेनानी अधिकारीको ८४ वर्षको उमेरमा शुक्रवार निधन भएको हो ।

पारिवारिक स्रोतका अनुसार उनको सिनामंगलस्थित काठमाडौं मेडिकल कलेजमा बिहान साढे २ बजे निधन भएको हो ।

रानुदेवीले राणाशासन विरुद्धको लडाइँमा गीत गाउँदै हिँडेकी थिइन् । उनले वि.सं. २००६ मा रेडियो नेपालमा गीत रेकर्ड गराएकी थिइन् ।

‘जुनेली रात हजुर’, ‘जागे नेपाली उठे नेपाली’ लगायतका गीतमा स्वर दिएर चर्चामा रहेकी रानुदेवी शास्त्रीय संगीतमा रुचि राख्थिन् ।

रानुदेवीका एक छोरा र दुई छोरी छन् । रानुदेवीका एक छोरा र एक छोरी अमेरिकामा बस्दै आएका छन् भने कान्छी छोरी काठमाडौं बस्ने गर्छिन् । उनको शुक्रवार बिहानै अन्त्यष्टि गरिएको जनाइएको छ ।