काठमाडौं – कोरोना भाइरस (कोभिड १९) को सामना र सहकार्य बारेमा नेकपाका नेता एवं विदेश विभाग प्रमुख माधवकुमार नेपालसहित उपप्रधानमन्त्री र मुख्यमन्त्रीहरुले चिनियाँ कम्युनिस्ट पार्टीको अन्तर्राष्ट्रिय विभाग प्रमुखसँग छलफल गरेका छन् ।

नेता नेपालसहित उपप्रधानमन्त्री तथा रक्षा मन्त्री इश्वर पोख्रेल, सात बटै प्रदेशका पार्टी इन्चार्ज (पृथ्वी सुब्बा बाहेक) र डाक्टरहरूले बुधवार चिनियाँ कम्युनिष्ट पार्टीका अन्तर्राष्ट्रिय विभाग प्रमुख सङ् ताओ, प्रोफेसर झोङ नान सान, मेडिकल डाक्टरहरू तथा बैज्ञानिक सहित तीन घण्टा लामो भिडियो कन्फेरेन्स गरेको नेता नेपालको सचिवालयले जानकारी दिएको छ ।

त्यसक्रममा पूर्व प्रधानमन्त्री नेपालले कोरोना रोकथाममा नेपालले गरिरहेको प्रयासबारे बताएका थिए ।

ताओले पनि कोरोना मानवीय समस्या भएकाले यसलाई लिएर विश्वका कसैले पनि राजनीति गर्न नहुने बताए । ताओले कारोना नियन्त्रणमा चिनियाँ तौरतरिका र अपनाइएका प्रविधिसमेत बारे बताएको नेपालका स्वकिय सचिव मोहन गौतमले जानकारी दिए ।