एजेन्सी–युरो २०२०को छनानेटका सुरुवाती २ खेलमा इटालीले लगातार दोस्रो जीत हात पारेको छ । मंगलबार राति भएको दोस्रो छनोट खेलमा समूह ‘जे’ मा रहेको इटालीले लिक्टेनस्टाइनको गोल पोष्टमा ६ गोल गर्दै शानदार जीत हासिल गरेको छ ।

लिक्टेनस्टाइनलाई ६—० गोल अन्तरले पराजित गर्ने क्रममा इटालीका ५ जना खेलाडीले गोल गरे । खेलको १७ औं मिनेटमा स्टेभानो सेन्सीले गोल गर्दै टिमलाई पहिलो अग्रता दिलाएका थिए । त्यसपछि ३२ औं मिनेटमा मार्को भेराट्टीले गोल गर्दै दोहोरो अग्रता बनाएका थिए ।

यस्तै, ३५ र ४५ औं मिनेटमा लिक्टेनस्टाइनका खेलाडीले इटालीका खेलाडीमाथि फाउनल गरेपछि लगातार दुई पेनाल्टी पाएको थियो । दुवै पेनाल्टी फवियो क्युआग्लीयोलाले गोल गर्दै टिमलाई पहिलो हाफमा ४—० गोलको फराकिलो अन्तर दिलाएका थिए ।

यस्तै, खेलको ६९ औं मिनेटमा मोइस केन र ७६ औं मिनेटमा लियोनार्दौ पाभालेटीले गोल गर्दै टिमलाई ६—० को शानदार जीत दिलाए ।