काठमाडौं– अन्तर्राष्ट्रिय मैत्रीपूर्ण खेलका लागि कुवेत पुगेको नेपाली टोली स्वदेश फर्किएको छ । एक साता अघि कुवेत गएको टोली मंगलबार नेपाल फर्किएको हो ।

कुवेतको राष्ट्रिय टोलीसँग नेपालली राष्ट्रिय टोलीले दुई वटा मैत्रीपूर्ण खेल खेलेको थियो । कुवेतसँग नेपाली टोलीले पहिलो खेलमा गोलरहित बराबरी खेले पनि दोस्रो खेलमा हार ब्यहोरेको थियो ।

कुवेतविरुद्धको खेलमा राष्ट्रिय टोलीका केही नियमित खेलाडी एएफसी यु—२३ खेल्न गएपछि घरेलु प्रतियोगिताहरुमा राम्रो प्रदर्शन गरिरहेका खेलाडीलाई लिएर मुख्य प्रशिक्षक योहान कालिन कुवेत पुगेका थिए ।

कुवेतमा नेपालका ६ जना खेलाडीले राष्ट्रिय टोलीबाट डेब्यु गरे । नेपालभन्दा फिफा बरियतमा माथि रहेको कुवेतसँगको खेल सुखद् भएको प्रशिक्षक कालिनले बताएका छन् ।

दुवै खेल बराबरी खेल्ने लक्ष्य रहे पनि नेपाली टोली दोस्रो खेलमा १—० गोल अन्तरले पराजित भएको थियो ।