काठमाडौं– समाजवादी पार्टी नेपालका अध्यक्ष उपेन्द्र यादवले अध्यादेश जारी गर्ने सरकारको कदम लोकतन्त्र विरोधी कार्य भएको बताएका छन् ।

बुधवार नेपाली कांग्रेसले आह्वान गरेको प्रतिपक्षी दलहरुको बैठकपछि प्रतिक्रिया दिँदै अध्यक्ष यादवले नाटकीय ढंगले अध्यादेश ल्याउनुपर्ने कुनै बाध्यता नभएको बताए ।

‘लोकतन्त्रलाइ रक्षा गर्न लोकतान्त्रिक शक्तिहरु सहकार्य गरेर पहिलोपटक बैठक बसेको हो, यादवले भने, संविधान तोड्नुपर्ने आवश्यकता उहाँलाई के थियो र ? नाटकीय ढंगले अध्यादेश ल्याउनुपर्ने के आवश्यकता थियो ?

अध्यक्ष यादवले दलहरुको रक्षा गर्ने जिम्मेवारी प्रधानमन्त्रीको भएको र अध्यादेश साना दलका लागि ल्याइएको भन्नु अपराध भएको बताए ।