काठमाडौं- नेपालमा कोरोना भाइरसको सम्भावित जोखिम रोक्न सरकारले लागू गरेको लकडाउनको आज २८ औं दिन पुगेको छ ।

करिब एक महिना कामविहीन हुँदा निम्न आय भएका नागरिकहरुको घरमा चुल्हो बल्न छाडिसकेको छ ।

यस्तो अवस्थामा सरकारले उनीहरुलाई राहतको व्यवस्था गरे पनि वास्तविक पीडित समक्ष पुग्न नसकेको जनगुनासाहरु समेत आइरहेका छन् ।

यही असहज अवस्थालाई मध्यनजर गर्दै काठमाडौं महानगर वडा नं. १७  क्षेत्रपाटी धोविचौरका स्थानीय युवाहरुले दैनिक खानपानको प्रबन्ध मिलाएका छन् ।

लक्ष्मी बहादुर शाही, किशोर मघैया र रुपेश शाहिको संयोजकतामा २५ जना युवाहरुको समूहले निम्न आय भएका परिवारलाई दैनिक व्यवस्थित रुपमा खानको प्रबन्ध मिलाएका हुन् ।

हरेक दिन साँझ ५ बजे देखि ७ बजेसम्म उनीहरुले विभिन्न दाताहरुको सहयोगमा खाना खुवाउँदै आइरहेका छन् ।

गत वैशाख ३ गते देखि शुरु गरिएको यस अभियानमा आइतबारसम्म ९४० जनालाई खाना खुवाइएको स्वयंसेवक किरन डङ्गोलले बताए ।

खाना पकाउने ठाउँदेखि लिएर वितरण गर्ने स्वयंसेवकहरुले पीपीई लगाएर खाना खान आउनेलाई सेवा दिँदै आएका छन् । खाना खान आउने सम्पूर्ण व्यक्तिहरुलाई सामाजिक दुरी ३ मिटर कायम गरी लाइनमा राख्ने गरिएको उनले बताए ।