काठमाडौं- लकडाउनमा काठमाडौंमा अलपत्र परेका रोल्पाका श्रमिकलाई गृहजिल्ला पठाइएको छ ।

उर्जा, जलस्रोत तथा सिंचाई मन्त्री वर्षमान पुनले लकडाउनमा अलपत्र परेका रोल्पामा श्रमिकहरुलाई बस चढाएर गृहजिल्ला पठाएका हुन् ।
काभ्रेबाट पैदल हिँडेर आइतबार काठमाडौंको साँखु आइपुगेका रोल्पाका ४६ र दाङका ४ जना मजदुरलाई जिल्ला प्रशासन कार्यालय काठमाडौंको समन्वयमा २ वटा बसमा उनीहरुलाई रोल्पा पठाइएको हो ।

मन्त्री पुनले प्रधानमन्त्रीको निर्देशन बमोजिम बाटोमा अलपत्र परेका नागरिकको उद्धार गर्ने नीति अनुसार दाङ र रोल्पाका मजदुरको उद्धार गरेर घरसम्म पठाउने काम गरेको बताएका छन् ।

रोल्पाका मजदुरहरु अलपत्र अवस्थामा हिडिरहेको सुचना आएको शंखरापुर नगरपालिकाका मेयर र त्यहाँका प्रहरीले सूचना दिएको बताउँदै मन्त्री पुनले उनीहरुलाई घर पठाएको बताए।