मुम्बई – कोरोना भाइरसको प्रकोप घट्नुको सट्टा बढ्दै गइरहेको छ । भाइरसका कारण विश्वभर मानिसको जनजीवन प्रभावित बनेको छ । बलिउड पनि कोरोनाका कारण ठूलो घाटामा छ ।

भाइरसकै कारण अक्षय कुमारको फिल्म ‘सूर्यवंशी’ र रणवीर सिंहको ‘८३’ को रिलिज मिति स्थगित गरिएको थियो । यतिबेला खबर आएको छ कि, आमिर खानको आगामी फिल्म ‘लाल सिंह चड्ढा’ मा पनि कोरोनाको ग्रहण लागेको छ ।

यो फिल्म आगामी क्रिसमसमा रिलिज गर्ने तयारी गरिएको थियो । अब भने फिल्म अर्को वर्षका लागि पोस्टपोन्ड गरिएको भारतीय मिडियाले जनाएका छन् ।

मेकरले पनि यस्तो संकटको अवस्थामा फिल्म प्रदर्शन गर्न चाहँदैनन् । अहिलेसम्म फिल्मको नयाँ मितिलाई लिएर कुनै आधिकारिक घोषणा गरिएको छैन ।

अद्वैत चन्दनको निर्देशनमा बनेको यो फिल्म हलिउड फिल्म ‘फरेस्ट गम्प’ को रिमेक हो । फिल्ममा आमिर खानसँगै करीना कपूर खान, मोना सिंह र दक्षिण भारतीय अभिनेता विजय सेतुपतिको पनि शीर्ष भूमिका रहनेछ ।