रौतहट- रौतहटको ईशनाथ नगरपालिकाका मेयरविरुद्ध लागू औषध कारोबारको आरोपमा मुद्दा नचल्ने भएको छ ।

मेयर र उनका भाइ विरुद्ध लागू औषध कारोबारको आरोपमा जिल्ला न्यायधिवक्ताको कार्यालय हेटौंडाले प्रमाण नपुगेको भन्दै मुद्दा नचल्ने निर्णय गरेको हो ।

नगरपलिकाको एम्बुलेन्समा गाँजा ओसारपसार भएको भन्दै प्रहरीले गाँजासहित ३ जनालाई पक्राउ गरेको थियो । सोही मुद्दामा मेयर सन्तोष मेहतामाथि अनुसन्धान गर्नु पर्ने भन्दै प्रहरीले पक्राउ पूर्जी जारी गरेको थियो ।

मेयर मेहता र उनका भाइ मोहनविरुद्ध मकवानपुर प्रहरीले लगाएको लागूऔषध ओसारपसारको आरोपमा यथेष्ट प्रमाण नपुगेपछि मुद्दा नचल्ने निर्णय भएको जिल्ला न्यायधिवक्ता खडिन्द्र कटवालले बताए ।

मेयर मेहता र उनको भाइको हकमा लागू औषध गाँजा ओसारपसारमा कुनै संलग्नता नदेखिएको र प्रमाण नपुग्ने भएपछि मुद्दा नचलाउने निर्णय भएको उनले बताए ।

मकवानपुरको नेवारपानीस्थित इलाका प्रहरी कार्यालयबाट खटिएको प्रहरी टोलीले माघ १२ गते रौतहटको डुमरिया स्वास्थ्य चौकीको बा २ झ १७४९ नम्बरको एम्बुलेन्समा गाँजा तस्करी गर्ने ३ जनालाई पक्राउ गरेको थियो ।

मकवानपुरको मनहरीबाट गाँजा लोड गरेको एम्बुलेन्सलाई हेटौंडातर्फ आउँदै गर्दा पूर्व–पश्चिम राजमार्गको नेवारपानीबाट नियन्त्रणमा लिइएको प्रहरीले जनाएको थियो ।