एजेन्सी–युरोपीयन च्याम्पियनसिप छनोट अन्तर्गत समूह ‘एच’मा रहेको विश्व विजेता फ्रान्सले आइसल्यान्डमाथि शानदार जीत हात पारेको छ । गएराति फ्रान्समा भएको खेलमा घरेलु टोलीले पाहुना आइसल्यान्ड ४—० गोल अन्तरले स्तब्ध पार्यो ।

आइसल्यान्डविरुद्धको खेलमा फ्रान्सका चार खेलाडीले गोल गरे । खेलको १२ औं मिनेटमा स्यामुयल उम्टीटीको गोलमा अग्रता बनाएको फ्रान्सले पहिलो हाफमा १—० गोलको अग्रता बनाएको थियो ।

तर, दोस्रो हाफमा ओलिभर गिरोडले उत्कृष्ट गोल गर्दै टिमलाई दोहोरो अग्रता दिलाए भने फ्रान्सबाट खेलेका ८९ अन्तराष्ट्रिय खेलमा गोल संख्या पनि ३५ पुरा गरेका छन् ।

२—० को अवस्थामा रहँदा युवा स्टाएइकर किलियन एमबाप्पेले ७८ औं तथा कप्तान एन्टोइनी ग्रिज्मयानले ८४ औं मिनेटमा गोल गर्दै फ्रान्सलाई ४—० गोल अन्तरको फराकिलो जीत दिलाए ।

फ्रान्सले छनोटको पहिलो खेलमा मोल्डोभालाई ४—१ गोलले पराजित गरेको थियो । जीतसँगै फ्रान्सले युरोपीयन च्याम्पियनसिप छनोटमा ६ अंक जोडेको छ ।