काठमाडौं– गत चैत पहिलो हप्ता इटालीबाट नेपाल आएकी काठमाडौंकी एक महिलामा र्‍यापिड टेस्टको क्रममा कोरोना संक्रमणको संकेत (एन्टिबडी) पोजेटिभ देखिएको छ ।

काठमाडौंको बुढानीलकण्ठ ९ मा बस्दै आएकी महिलामा र्‍यापिड डाइग्नोस्टिक टेस्ट (आरडीटी)कका क्रममा कोरोना संक्रमणको संकेत (एन्डिबडी) पोजेटिभ देखिएको हो ।

आरडीटी टेस्टका क्रममा एन्टिबडी पोजेटिभ देखिए पछि उनको थ्रोट स्वाब संकलन गरी पीसीआर परीक्षणका लागि राष्ट्रिय जनस्वास्थ्य प्रयोगशाला टेकु पठाइएको बुढानीलकण्ठ नगरपालिकाका मेयर उद्धवप्रसाद खरेलले जानकारी दिए ।

मेयर खरेलका अनुसार इटालीबाट आएकी ती महिला होम क्वारेन्टाइनमा बस्दै आएकी छन् ।

मेयर खरेलले पीसीआर परीक्षणको रिपोर्ट आएपछि मात्रै महिलालाई आइसोलेसनमा भर्ना गर्ने वा घरमै राख्ने भन्ने निर्णय हुने जानकारी दिए ।

यसअघि काठमाडौंको पेप्सीकोलास्थित सनसिटी अपार्टमेन्टमा बस्दै आएका ३ जनामा र्‍यापिड टेस्टका क्रममा कोरोना संक्रमणको संकेत देखिएको थियो । तर, पीसीआर परीक्षणका क्रममा २ जना मात्रै कोरोना भाइरसको संक्रमण देखिएको थियो ।