काठमाडौं – पेट्रोलियम पदार्थ उत्पादक राष्ट्रहरुले प्रतिदिन एक करोड ब्यारेल तेल उत्पादन कटौती गर्न सहमति भएका छन् ।

कोरोना भाइरस संक्रमणबाट अन्तर्राष्ट्रिय बजारमा तेलको  मागमा आएको कमीका कारण मूल्यलाई स्थिर राख्नका लागि उत्पादनमा दश प्रतिशत कटौती गर्ने सहमति भएको बीबीसीले जनाएको छ।

तेल उत्पादक राष्ट्रहरुबीच आइतरबार भएको एक भिडियो कन्फ्रेन्समार्फत उक्त सहमति भएको हो।

ओपेक प्लस तेल उत्पादकबीच ९ अप्रिलमा कटौतीको विषयलाई लिएर सम्झौता हुने तय भएको थियो। तर मेक्सिकोले उत्पादन कटौतीको विरोध गरेपछि ओपेकले घोषणा गर्न सकेको थिएन।

अहिलेसम्म ओपेक, रुस र अन्य सहयोगी तेल उत्पादक देशबीच प्रतिदिन ९०.७ लाख ब्यारल तेल कटौती गर्न भएको उक्त सहमति आउदो मे १ देखि लागु हुनेछ ।

सम्झौता अनुसार ओपेक प्लस समूहसँग अलग रहेका अमेरिका, क्यानडा, ब्राजील र नर्वेले पनि ५० लाख ब्यारेल कटौती गर्नेछन्।

अमेरिकी राष्ट्रपति डोनाल्ड ट्रम्प र कुवेतका उर्जामन्त्री डा. खालिद अली मोहम्मद अल–फादेलले ट्वीट गर्दै यसबारे जानकारी दिएका छन् ।

साउदी अरबको उर्जा मन्त्रालय र रुसीको सरकारी न्यूज एजेन्सी तासले पनि यसको पुष्टि गरेका छन्।

विश्वभरमा कोरोनाभाइरस संक्रमणका कारण तीन अरब भन्दा बढी मानिस घरभित्रै बस्न बाध्य हुँदा पेट्रोलियम पदार्थको खपत हुन सकिरहेको छैन ।

यसैकारण अन्तर्राष्ट्रिय बजारमा तेलको मूल्य १८ वर्षयताकै  सबैभन्दा सस्तो भएर प्रति ब्यारेल २० डलर भन्दा तलसम्म झरेको थियो ।