काठमाडौं– निजी क्षेत्रको दूरसञ्चार सेवा प्रदायक कम्पनी एनसेलले शेयर स्वामित्व खरिदबिक्री बापत तिर्नुपर्ने बाँकी पूँजीगत लाभकर पनि बुझाएको छ ।

एनसेलले बैंकहरुसँग ऋण लिएर सरकारलाई तिर्नुपर्ने बाँकी १४ अर्ब ३३ करोड ५६ लाख ५२ हजार ५४६ रुपैयाँ पूँजीगत लाभकर बुझाएको हो । यससँगै एनसेलले तिर्नुपर्ने पूँजीगत चुक्ता भएको छ ।

दुई हप्ता अगाडि मात्रै एनसेलले दोस्रा किस्ताअन्तर्गत ४ अर्ब ६० करोड पूँजीगत लाभकर बुझाएको थियो ।

एनसेलले पहिलो किस्तामा ४ अर्ब ५० करोड, दोस्रो किस्तामा ४ अर्ब ६० करोड र तेस्रो तथा अन्तिम किस्तामा १४ अर्ब ३३ करोड गरी सरकारलाई २३ अर्ब १६ करोड रुपैयाँ पूँजीगत लाभकर बुझाएको छ ।

अन्तिम किस्ता बुझाएसँगै लामो समयदेखि चर्चा र विवादको विषय बन्दै आएको पूँजीगत लाभकरको दायित्वबाट एनसेल मुक्त भएको छ ।