काठमाडौं– कतारमा जारी एएफसी यू-२३ च्याम्पियनसिप छनोटमा नेपाललेलगातार दोस्रो हार व्यहोरेसँगै छनोट चरणबाट बाहिरिएको छ । आइतबार राति भएको खेलमा नेपाल कतारसँग ५-० गोलको फराकिलो अन्तरले पराजित भएको हो ।

कतारको दोहास्थित स्पोर्टस सिटी सेन्टरमा कतारका लागि कप्तान बासम अल रावी र अब्दुल्लाह अल्हारकले समान २-२ गोल गर्दै नेपालविरुद्ध सहज जीत निकाल्न योगदान गरे ।

नेपाली खेलाडीले खेलको २५ औं मिनेट डिबक्सभित्र फाउल गरेपछि कतारले पेनाल्टी पाएको थियो । उक्त पेनाल्टीमा अब्दुल्लाहले गोल गर्दै घरेलु नेपालविरुद्ध १-० को अग्रता दिलाए ।

पहलो हाफसम्म १-० को अवस्थामा रहेको खेलमा खेलको ५३ औं मिनेटमा कप्तान अल रावीले गोल गर्दै कतारलाई २-० को अग्रता दिलाए । नेपालका दिनेस राजवंशीले ६० औं मिनेटमा आत्मघाती गोल गरेपछि कतारको अग्रता ३-० को बन्यो ।

७६ औं मिनेटमा अल रावीले फ्रिकिकबाट आफ्नो दोस्रो गोल गर्दै कतारलाई ४-० को फराकिलो अग्रता दिलाए । त्यसपछि खेलको इन्जुरी समयमा अब्दुल्लाहले व्यक्तिगत दोस्रो गोल गर्दै कतारलाई ५-० को फराकिलो जित दिलाए ।

कतारसंगको हारसंगै समूह ’ए’ मा रहेको नेपाल प्रतियोगिताबाट बाहिरिएको छ । नेपालले अन्तिम खेलमा मंगलबार अफगानिस्तानसंग खेल्नेछ ।