धनगढी– सुदूरपश्चिम प्रदेश सरकारले कोरोनाभाइरस संक्रमितको उपचारमा खटिने स्वास्थ्यकर्मीलाई १५ लाख रुपैयाँ बराबरको बीमा गर्ने निर्णय गरेको छ।

बिहीबार बसेको मन्त्रिपरिषद् बैठकले संघीय सरकारले ल्याएको स्वास्थ्यकर्मीको बीमा योजनामा प्रदेशका तर्फबाट १५ लाख उपलब्ध गराउने निर्णय गरेको हो।

आन्तरिक मामिला तथा योजना मन्त्री प्रकाश शाहले स्वास्थ्यकर्मीका लागि संघीय सरकारले गर्ने बीमामा प्रदेश सरकारले थप १५ लाख रुपैयाँ उपलब्ध गराउने निर्णय गरेको बताए।

यसै गरी बिहीबार बसेको मन्त्री परिषदको बैठकले अति विपन्न, असहाय र ज्यालादारी मजदुरका परिवारका लागि हरेक परिवारलाई ३ हजार उपलब्ध गराउने गरी १६ करोड बजेट छुट्याएको छ।

‘अति विपन्न, असहाय र ज्यालादारी मजदुरका परिवारलाई ३ हजारका दरले राहत दिइने छ’, मन्त्री शाहले भने, ‘प्रदेश सरकारले स्थानीय तहलाई १६ करोड सहयोग गर्ने छ ।’

मन्त्रिपरिषद् बैठकले प्रदेशमा कार्यरत स्वास्थ्यकर्मी, सुरक्षाकर्मी र सञ्चारकर्मीको विमा गर्ने निर्णय गरेको छ । संघीय सरकारले गरेको विमामा थप १५ लाखको विमा गर्ने मन्त्री शाहले जानकारी दिए । ‘संघीय सरकारले ल्याएको स्वास्थ्यकर्मीको विमामा प्रदेश सरकारले १५ लाख थप्ने निर्णय भएको छ’, प्रवक्ता शाहले भने ।

प्रदेशका विभिन्न जिल्लाका लागि २० वटा भेन्टिलेटरको खरिद गर्ने निर्णय भएको छ । यस्तै जिल्ला प्रशासन कार्यालयलाई ५ लाखका दरले कोरोना रोग नियन्त्ररण र व्यवस्थापनका लागि रकम उपलब्ध गराउने निर्णय भएको छ ।

नेपाली सेना, शसस्त्र प्रहरी र नेपाल प्रहरीको लागी १५ लाखका दरले रकम उपलब्ध गर्ने भएको छ । कोरोना रोग व्यवस्थापनका लागि उक्त रकम उपलब्ध गर्ने निर्णय प्रदेश सरकारले गरेको छ । मन्त्रlपरिषद् बैठकले कोष सञ्चालन निर्देशिका र राहत वितरण मापदण्ड पारित गरेको छ ।