काठमाडौं- परीक्षा अनुगमनका क्रममा प्रदेश–२ का सामाजिक विकासमन्त्री नवलकिशोर साहले केन्द्राध्यक्ष र शिक्षकलाई हप्कीदप्की गरेका छन्। मन्त्रीको यो कदमलाई अपमानको संज्ञा दिँदै शिक्षक आन्दोलित भएका छन्।

माध्यमिक शिक्षा परीक्षा (एसईई)को पहिलो दिन आइतबार बिहान ९ बजे मन्त्री साह जनकपुरको सरस्वती नमुना मावि पुगेका थिए। शिक्षक शंकरकुमार दासलाई कार्डबिना देखेपछि मन्त्रीले केन्द्राध्यक्ष सत्यनारायण मण्डल बोलाएर परीक्षा हलबाट बाहिर निकाल्न निर्देशन दिए। मन्त्रीले दासलाई परिचयपत्रमा फोटो किन नटाँसेको भनी प्रश्न गरेका थिए।

केन्द्राध्यक्ष मण्डलले उनी आफ्नै विद्यालयको शिक्षक रहेको जवाफ फर्काएका थिए। त्यसपछि मन्त्रीले आफूलाई गाली गरेको मण्डलले सुनाए। ‘तिमी खत्तम हेडमास्टर रहेछौं। तिमीलाई हेडमास्टर कसले बनायो ? कसले केन्द्राध्यक्ष बनायो? ’, मन्त्रीको भनाइ उद्धृत गर्दै उनले भने, ‘तिम्रो कुनै काम छैन। सस्पेन्ड गरिदिन्छु।’

मन्त्रीले फोटोबिनाको परिचयपत्र बोकेका निरीक्षक बेचन रामलाई भेटाए। राम पनि सोही विद्यालयका शिक्षक हुन्। मन्त्रीले सोधे, ‘फोटो किन नटाँसेको ? ’ मन्त्रीले भोलिदेखि परिचयपत्रमा फोटो टाँसेर आउन निर्देशन दिए।

फोटोबिनाको परिचयपत्र बोकी परीक्षामा निरीक्षक बनेका शिक्षकलाई किन यस्तो गरेको भनेर प्रश्न सोधेको मन्त्री साहले स्वीकार गरे। ‘मैले परीक्षालाई मर्यादित बनाउन र परीक्षामा कडाइ गर्न शिक्षकको परिचयपत्र खोजेको थिएँ’, उनले भने।

४ सय १० परीक्षार्थी रहेको सरस्वती मावि केन्द्रमा आइतबार ४ सय ८ जना सहभागी भए। प्रत्येक कोठामा चार जना घुम्ती र केन्द्राध्यक्ष गरी २३ जना गार्ड खटिएका थिए। शंकर दास, सीमाकुमारी कर्ण, विनिता यादव र बेचन राम चार निरीक्षक परिचयपत्रमा फोटो नटाँसी परीक्षा हलमा थिए। उनीहरू ढिला गरी परीक्षा केन्द्रमा पुगेकाले फोटो टाँस्न ढिलाइ भएको केन्द्राध्यक्ष मण्डलले बताएको अन्नपूर्णपोस्टमा खबर छ।

त्यस्तै पत्रिकाले सरकारको ब्याक गियर छैन शीर्षकमा लेखेको समाचारमा प्रधानमन्त्री केपी शर्मा ओलीले संसदको हिउँदे अधिवेशनको अन्तिम दिन आइतबार संसदलाई सम्बोधन गर्दै सरकारको ब्याग गियर नभएको बताएका थिए । उनले विप्लव नेतृत्वको समूहका नाममा भइरहेका विध्वंसात्मक गतिविध सरकारले नियन्त्रण गरिछाड्ने बताए ।

लगानी सम्मेलनका लागि ३१ खर्बमा परियोजना, ठमेलमा पर्यटन सूचना केन्द्र, अयोधीप्रसाद यादव र इला शर्माको निर्वाचन आयोगबाट बिदाइ, नेपाली कांग्रेसका नेता कृष्ण सिटौलाको स्वास्थ्यमा सुधार लगायतमा समाचार प्राथमिकताका साथ छापेको छ ।