काठमाडौं– सत्तारुढ नेपाल कम्युनिस्ट पार्टी (नेकपा)को सचिवालय बैठक शुरु भएको छ ।

कोरोना भाइरसको विश्वव्यापी महामारी तथा नेपालका सन्दर्भमा संक्रमण नियन्त्रणका लागि भइरहेका प्रयासबारे छलफल गर्न बोलाइएको सचिवालय बैठक केही समय अगाडिदेखि प्रधानमन्त्रीको सरकारी निवास बालुवाटारमा शुरु भएको हो ।

बैठकमा प्रधानमन्त्री तथा पार्टी अध्यक्ष केपी शर्मा ओलीले कोरोना भाइरसको संक्रमण, रोकथाम र उपचारको सन्दर्भमा सरकारका तर्फबाट चालिएका कदमबारे जानकारी गराएका छन् ।

प्रधानमन्त्री ओलीले कोरोना भाइरसको विश्वव्यापी महामारी तथा त्यसबाट बच्न नेपाल सरकारले चालेका कदम र प्राप्त गरेका उपलब्धिहरुको बारेमा पनि बैठकमा जानकारी गराएका उनका प्रेस सल्लाहकार सूर्य थापाले जनाएका छन् ।

बैठकमा कोरोना भाइरसको संक्रमण रोकथाम तथा परीक्षणसँग सम्बन्धित स्वास्थ्य सामग्री खरिदको विषयमा भएको अनियमितताका सन्दर्भमा पनि छलफल हुने जनाइएको छ ।

स्वास्थ्य मन्त्रालयले निजी कम्पनीसँग ठेक्का सम्झौता गरी स्वास्थ्य सामग्री आयात गर्दा भ्रष्टाचार भएको विषय सार्वजनिक गरेपछि सरकारले ठेक्का सम्झौता नै रद्द गरेको थियो ।

निजी कम्पनीसँगको ठेक्का सम्झौता रद्द भएपछि सरकार नेपाली सेनालाई स्वास्थ्य सामग्री ल्याउने जिम्मा दिएको थियो । सेनालाई स्वास्थ्य सामग्री ल्याउने निर्णयको नेकपा भित्रै विरोध भइरहेको छ ।

स्वास्थ्य समग्री खरिदमा भएको भनिएको अनियमितता तथा सेनालाई स्वास्थ्य सामग्री खरिद गर्न दिने सम्बन्धमा पार्टी भित्रै विवाद देखिएपछि मंगलबार नेकपाले सचिवालय बैठक बोलाएको हो ।

सचिवालय बैठकमा पार्टीका अर्का अध्यक्ष पुष्पकमल दाहाल प्रचण्डसहित सचिवालयका सबै सदस्यहरु सहभागी छन् ।