काठमाडौं– निक साइमन इन्स्टिच्यूटले स्वास्थ्य तथा जनसंख्या मन्त्रालयलाई १ हजार थान व्यक्तिगत सुरक्षा सामग्री (पीपीई) र १० वटा पोर्टेबल भेन्टिलेटर सहयोग गरेको छ ।

निक साइमनका सीईओ डाक्टर अनिल श्रेष्ठले स्वास्थ्य मन्त्रालयमा पुगेर उक्त स्वास्थ्य सामाग्रीहरू स्वास्थ्य मन्त्री भानुभक्त ढकाललाई हस्तान्तरण गरेका हुन् ।

निक साइमनबाट सहयोगमा प्राप्त पीपीई तथा भेन्टिलेटर स्वास्थ्य सेवा विभागले आवश्यकता परेका अस्पतालमा पठाउने तयारी गरेको विभागका महानिर्देशक महेन्द्र प्रसाद श्रेष्ठले खबरहबलाई बताए ।

‘निक साइमनले पिपिइ र केही भेन्टिलेटर सहयोग गरेको छ, आज हस्तान्तरण भए पनि पीपीईहरु यसअघि नै विभागमा आइसकेको थियो । हामीले पीपीईहरु अस्पतालको आवश्यकता अनुसार वितरण गरिसकेका छौं,’ विभागका महानिर्देशक श्रेष्ठले भने, ‘भेन्टिलेटरहरु प्रदेशका अस्पतालमा भोलि (बुधबार) पठाउने तयारी गरेका छौं ।’

विभागका महानिर्देशक श्रेष्ठका अनुसार सहयोगस्वरुप प्राप्त १० वटा भेन्टिलेटर धनगढी, सुर्खेत, बुटवल र बाग्लुङ मा २–२ वटाका दरले पठाउने तयारी भएको छ ।