काठमाडौं – चीनले स्वदेशमै खपत हुनेगरी कोरोना भाइरसको परीक्षण किट उत्पादनको अनुमति नलिएका कम्पनीहरुद्वारा उत्पादित स्वास्थ्य उपकरण विदेश निर्यातमा प्रतिबन्ध लगाएको छ ।

चीनमा खपत गर्नका लागि उपकरण बनाउने अनुमति नभएका कम्पनीहरुलाई विदेशमा स्वास्थ्य उपकरण निर्यात गर्न चीनले प्रतिबन्ध लगाएको हो ।

विभिन्न युरोपेली मुलुकहरुमा पठाइएका यस्ता उपकरण गुणस्तरहीन भएको समाचार आएसँगै चीनले प्रतिबन्धको घोषणा गरेको हो ।

चीनको वाणिज्य मन्त्रालय, भन्सार प्रशासन र राष्ट्रिय मेडिकल उत्पादन प्रशासनले संयुक्त विज्ञप्ति जारी गर्दै परीक्षण किट, मास्क, पीपीई, भेन्टिलेटर र इन्फ्रारेड थर्मोमिटर निर्यात गर्न चाहने सबै कम्पनीहरुलाई नयाँ नियम लागू हुने उल्लेख गरेका छन् ।

यसअघि चीनका निर्यातकताहरुले युरोपेली आर्थिक क्षेत्रमा यस्ता सामान पठाउँदा मानिसहरुको स्वास्थ्य र सुरक्षा मापदण्ड पूरा गरी सीई गुणस्तर चिह्न लिनुपर्ने प्रावधान थियो ।

केही समयअघि स्पेन, नेदरल्याण्ड्स, चेक गणतन्त्र लगायतका मुलुकले चीनबाट आयात गरिएका स्वास्थ्य उपकरणले गलत नतिजा दिएको बताएका थिए ।