काठमाडौं- पोर्चुगलमा कोरोना भाइरसको संक्रमणमा परेका तीन नेपाली उपचारपछि आफ्नो निवास फर्किएका छन् ।

फारोको क्वारेन्टाइनमा रहेका उनीहरु स्वस्थ रहेको प्रमाणपत्र लिएर क्वारेन्टाइनबाट बिदा भएका हुन् । अब उनीहरु आफ्नै बासस्थानमा बस्न पाउनेछन् ।

उपचारपछि उनीहरुले क्वारेन्टाइनमा सहयोग गर्ने तथा उपचारमा संलग्न चिकित्सकहरुलाई धन्यवाद दिँदै क्वारेन्टाइनबाट बिदा लिएका छन् ।

पोर्चुगलमा अहिलेसम्म कोरोना भाइरस संक्रमितको संख्या ७ हजार ४ सय ४३ पुगेको छ । संक्रमितमध्ये १ सय ६० जनाले ज्यान गुमाएका छन् । ४३ जना उपचारपछि निवास फर्किएका छन् ।

अहिले पोर्चुगलमा ७ हजार २ सय ४० जना संक्रमित विभिन्न अस्पताल, आइसोलेसन र क्वारेन्टाइनमा छन् । त्यसमध्ये १ सय ८८ जनाको अवस्था गम्भीर रहेको छ । बितेको २४ घण्टाको अवधिमा पोर्चुगलमा नयाँ संक्रमण र मृत्युको घटना भएको छैन ।