काठमाडौं– कोरोना संक्रमणको जोखिम कम गर्न भनेर सरकारले जारी गरेको लकडाउनको आदेश उल्लंघन गर्नेलाई ग्यासको सिलिन्डर बोकाएर सडकमा बसाएको घटनाप्रति प्रहरीले अनुसन्धान शुरु गरेको छ ।

अहिले सामाजिक सञ्जालमा भाइरल भइरहेको तस्वीरको विषयमा प्रहरी प्रधान कार्यालयले अनुसन्धान शुरु भएको जानकारी दिएको हो ।

सामाजिक सञ्जालमा भाइरल भइरहेको उक्त तस्वीरमा एक जना व्यक्ति काँधमा ग्यासको सिलिण्डर बोकेर सडकमा बसिरहेका छन् । उनको अगाडि एक जना महिला प्रहरी छन् ।

सामाजिक सञ्जाल प्रहरीकर्ताहरुले प्रहरीले बल प्रयोग गरी लकडाउन कार्यान्वयन गर्ने नाममा सर्वसाधारणमाथि ज्यादती गरेको भन्दै आलोचना गरिरहेका छन् । केहीले भने लकडाउन उल्लंघन गर्नेलाई यस्तै सजाय हुनुपर्ने भन्दै प्रहरीको प्रसंशा पनि गरिहेका छन् ।

प्रहरीका केन्द्रीय प्रवक्ता प्रहरी वरिष्ठ उपरीक्षक (एसएसपी) उमेशराज जोशीले तस्वीरको विषयमा अनुसन्धान शुरु भएको बताएका छन् । तर, उक्त तस्वीर कुन ठाउँको हो भन्ने विषय भने खुल्न सकेको छैन ।

प्रहरी प्रवक्ता एसएसपी जोशीले अहिले पहिलोपटक सामाजिक सञ्जालमा तस्वीर शेयर गर्ने व्यक्तिसँग सोधपुछ थालिएको बताएका छन् ।