काठमाडौं- सत्तारुढ दल नेकपाका अध्यक्ष पुष्पकमल दाहाल प्रचण्डले कोरोना भाइरसको संक्रमणसँग जुधिरहेको नेपाललाई सहयोग गर्न अपिल गर्दै चिनियाँ राष्ट्रपति सी चिनफिङलाई पत्र लेखेका छन् ।

उनले पत्रमा कोरोना महामारी नियन्त्रणमा सफलता पाएकोमा चिनियाँ राष्ट्रपति सीलाई बधाइसमेत दिएका छन् ।

पत्रमा उनले कोरोना भाइरससँगको लडाइमा जीत हात पारेकोमा नेकपाको तर्फबाट बधाइसमेत दिएका छन् ।

अध्यक्ष प्रचण्डकी छोरीसमेत रहेकी स्वकीय सचिव गंगा दाहालका अनुसार पत्र तीन दिन अघि पठाइएको थियो ।

पत्रमा प्रचण्डले कोरोना महामारीसँग अहिले नेपाल जुधिरहेको उल्लेख गर्दै सहयोगको लागि सीसँग अपिल गरेका छन् ।

चीनको हुेबई प्रान्तको उहानबाट शुरु भएको कोरोना भाइरस अहिले विश्वभर महामारीको रुपमा फैलिएको छ भने कयौं हजारले ज्यान गुमाएका छन् ।

चीनमा कारोना भाइरसबाट अहिलेसम्म करिब ८१ हजार संक्रमित भएका छन् । तीमध्ये तीन हजार तीन सयको मुत्यु भएको छ । तर पछिल्लो समय चीनमा कोरोना भाइरस संक्रमितको संख्या छैन ।