काठमाडौं-कोरोना भाइरसको महामारी बढेसँगै बेलायतमा यससम्बन्धी उपचारका लागि छुटटै अस्पताल निर्माणको काम शुरु भएको छ ।

आपतकालिन अस्पताल निर्माणका लागि ठुलो संख्यामा गोरखा सैनिक परिचालन गरिएको छ ।

ब्रिटेन–कमनवेल्थ फोर्सलाई उदृत गर्दैै नेपाल ब्रिटेन डटकमले जनाए अनुसार लण्डनको डकल्याण्डमा बेलायतको सबैभन्दा ठूलो अस्पतालको निर्माणको लागि क्वीन गोरखा इञ्जिनियरहरू परिचालन गरिएको हो । उनीहरुले हप्ता देखिनै काम थालेका थिए ।

४ हजार बेडको अस्पताल निर्माणका लागि उनीहरु खटिएका हुन । सन् १९४८ देखि बेलायती सेनामा गोरखा इञ्जिनियरहरुले छुट्टै सेवा दिदै आएका छन् ।

यसअघि पनि बेलायतले गोरखा डिभिजनल इन्जिनियरहरूलाई आपतकालमा परिचालन गर्दै आएको थियो । विश्वभरि सजाल भएको सो टोलीले आपतकालिन अवस्थामा महत्त्वपूर्ण भूमिका खेल्दै आएको छ ।

बेलायतमा कोभिड १९ बाट ज्यान गुमाउनेहरुको संख्या १०१९ पुगेको छ । शनिवार मात्र २६० जनाको मृत्यु भएको वेलायती संचारमाध्यमहरुले जनाएका छन् ।

१७ हजार ८९ जनामा कोरोना संक्रमण देखिएको छ ।