एजेन्सी- विश्वव्यापी रुपमा कोरोना भाइरसको संक्रमण फैलिरहेका बेला संक्रमण रोकथामका लागि सबै क्षेत्रबाट सहयोगको घोषणा भएका छन् ।

कोरोना भाइरसविरुद्ध लड्न भारतीय मनोरञ्जन क्षेत्रका स्टार कलाकारकारहरूले खुलेर अग्रसरता देखाइरहेका छन्।

भारतीय स्टार कलाकारहरूले आ–आफ्नो तर्फबाट आर्थिक सहयोगको घोषणा गरिरहेका बेला अभिनेता अक्षय कुमारले २५ करोड भारतीय रूपैयाँ सहयोग गर्ने घोषणा गरेका छन्।

शनिबार अक्षयले आफ्नो अफिसियल ट्वीटरमार्फत् ट्वीट गर्दै लेखेका छन्, ‘यो समय जनताको जीवन रक्षाको समय हो र सबैले सकेजति केही न केही गर्नुपर्ने समय पनि हो। त्यसैले म मेरो बचतबाट रु २५ करोड प्रधानमन्त्री राहत कोषमा सहयोगको घोषणा गर्दछु,।’

यसैगरी सरकारले घोषणा गरेको राहत कोषमा अन्य अभिनेताहरूमा प्रभासले रु १ करोड, महेश बाबुले रु १ करोड रूपैयाँ राहत कोषमा जम्मा गर्ने भएका छन्। त्यस्तै अर्का अभिनेता पवन कल्याणले पनि राहत कोषमा १ करोड सहयोग गर्ने घोषणा गरिसकेका छन्।

भारतमा २१ दिन लामो लकडाउन घोषणासँगै जनजीवन प्रभावित बनेको छ। भारतमा शनिबार बेलुकीसम्म २० जनाो मृत्यू भएको छ भने ९ सय ३३ जनामा संक्रमण देखिएको छ । जसमध्ये ८४ जना उपचारपछि निको भएका छन् भने ८ सय २९ जना उपचाररत रहेका छन् ।