काठमाडौं – लकडाउनका कारण खाद्यान्न अभाव हुन थालेको भन्दै सर्वसाधारणले चिन्ता जाहेर गरिरहँदा घरघरमै खाद्यान्न पुर्‍याउँने व्यवस्था सुरु भएको छ ।

कोरोना भाइरस संक्रमण बढेपछि सरकारले गरेको ‘लकडाउन’ ले घरमै बस्न बाध्य भएका सर्वसाधारणलाई अत्यावश्यक खाद्यवस्तु घरघरमै उपलब्ध गराउँन सरकारले व्यावसायीलाई आग्रह गरेपछि यो सेवा सुरु भएको हो ।

गृह मन्त्रालयमा बसेको सचिवस्तरीय बैठकले ‘लकडाउन’मा रहेका नागरिकलाई खाद्यवस्तु उपलब्ध गराउन आग्रह गरेको थियो ।

सरकारी आग्रहपछि खाद्य स्टोर, सपिङ सेन्टर, सुपरमार्केट तथा ठूला सपिङ मलले घरघरमै खाद्यवस्तु पुर्‍याउन थालेका हुन् ।

सरकारी आग्रहअघि नै विभिन्न सपिङ मल र खाद्य स्टोरले एप्स र अनलाइनमार्फत यो सेवा दिदै आएकोमा अब त्यसले समेत बैधानिकता ग्रहण गरेको छ ।

सरकारी संस्थान खाद्य व्यवस्था तथा ब्यापार कम्पनीले भने मोबाइल भ्यानमार्फत टोलटोलमा खाद्यान्न पुर्‍याउँदै आएको छ ।