अमेरिका- चीनको वुहानबाट शुरु भएको कोरोनाभाइरसको संक्रमण यूरोपियन मुलुक हुँदै अहिले अमेरिका आक्रान्त बन्दै गएको छ । अमेरिकाको पनि न्यूयोर्क शहर नयाँ इपिसेन्टरका रुपमा देखा परेको छ ।

अमेरिकाको न्यूयोर्क सिटीमा कोरोना भाइरसबाट संक्रमित हुनेहरुको संख्या २६ हजार ६ सय ९७ पुगेको छ । न्यूयोर्क सिटीभित्रमात्र ५ हजार २५० जना अस्पतालमा भर्ना गरिएका छन् भने १ हजार १ सय ७५ जनालाई आईसीयूमा राखेर उपचार थालिएको जनाइएको छ ।

शनिबारसम्मको विवरण अनुशार न्यूयोर्क सिटीभित्र सबैभन्दा धेरै संक्रमित छन् । न्यूयोर्कको क्वीन्समा संक्रमितको संख्या ८ हजार ५ सय २९ रहेको छ । न्युयोर्कको क्वीन्समा नेपालीहरुको बाक्लो बसोबास समेत रहेको छ ।

न्यूयोर्कको ब्रुकलिनमा ७ हजार ९१ मा संक्रमण पुष्टि भएको छ भने ब्रोंक्समा ४ हजार ८ सय ८० मा संक्रमण पुष्टि भएको छ । म्यानहटनमा ४ हजार ६ सय २७ जनामा संक्रमण पुष्टि भएको छ भने स्टेटन आइल्याण्ड १५ सय ३४ जनामा संक्रमण पुष्टि भएको छ ।

न्युयोर्कसिटीमा अहिलेसम्म ४५० जनाको मृत्यु भएको छ ।  अमेरिकामा हालसम्म १ लाख ४ हजार भन्दा बढी संक्रमित भएका छन् ।

कोरोनाभाइरसको संक्रमणका कारण १७ सय बढीले ज्यान गुमाइसकेका छन् । २५ सय बढी उपचारपछि निको भएका छन् भने २५ सय बढीको अवस्था गम्भीर रहेको जनाइएको छ । झण्डै एक लाखको उपचार भइरहेको छ ।