काठमाडौं- प्रधानमन्त्री केपी शर्मा ओली अस्पतालबाट डिस्चार्ज भएका छन् ।

स्वास्थ्यमा समस्या देखिएपछि विहीबार राति महाराजगञ्जस्थित मनमोहन कार्डियोभाष्कुलर एण्ड ट्रान्सप्लान्ट सेन्टरमा भर्ना भएका ओली करिव २० घण्टापछि वालुवाटार फर्किएका हुन् ।

स्वास्थ्यमा सुधार भएसँगै उनलाई अस्पतालले डिस्चार्ज गरेको हो । गए राति मुटुको धड्कन बढ्ने समस्याका कारण अस्पताल भर्ना भएका थिए ।

प्रधानमन्त्री ओलीले करिब २० घण्टा अस्पतालमा रहेर उपचार गराएकाे उनका प्रेस सल्लाहकार सूर्य थापाले जानकारी दिए।

उनको २४ दिन अघि (गत फागुन २१ गते) शिक्षण अस्पतालमा दोस्रोपटक मिर्गाैला प्रत्यारोपण गरिएको थियो । प्रधानमन्त्रीको उपचारमा संलग्न अस्पताल, चिकित्सकहरू, नर्सहरू र सबैमा उनको सचिवालयले धन्यवाद ज्ञापन गरेको छ ।