काठमाडौं – नायिका वर्षा शिवाकोटी यतिबेला घरमै बसिरहेकी छिन् । पोखरामा फिल्म ‘परदेशी २’ को छायांकन स्थगन गरेर राजधानी फर्केको भोलिपल्टै सरकारले नेपालभर लकडाउन घोषणा गर्‍यो ।

लकडाउनपछि वर्षा घरबाहिर निस्किरहेकी छैनिन् । घरमै परिवारका साथ रमाइरहेकी छिन् । पुस्तक पढिरहेकी छिन् । र शरीरलाई तन्दुरुस्त राख्न शारीरिक अभ्यास गरिरहेकी छिन् ।

यतिबेला उनी मिचेल ओबामाको पुस्तक ‘बिकमिङ’ पढिरहेको बताउँछिन् । भन्छिन्, ‘अरुले फिल्म हेरिरहेकी छु भन्नुहुन्छ, म चाहिँ पुस्तक पढिरहेकी छु ।’

विशेष कामबाहेक खासै बाहिर नगएको बताउने वर्षा किचनमा पनि पर्याप्त समय दिएको बताउँछिन् ।

‘हामी त काठमाडौं फर्किनासाथ लकडाउन भयो, अहिले घरमै रमाइरहेकी छु, ख्याल गरिरहेकी छु,’ वर्षा भन्छिन् ।

वर्षा अरुलाई पनि घरबाहिर ननिस्किन अनुरोध गर्छिन् । भन्छिन्, ‘सरकारले नै बाहिर ननिस्कन भनिरहेका बेला सकभर बाहिर नजाऔं, आफ्नो स्वास्थ्यको ख्याल गरौं ।’

उनी यो समयमा आफूमा के परिवर्तन ल्याउन सकिन्छ, त्यो गर्न अरुलाई पनि सल्लाह दिन्छिन् । भन्छिन्, ‘अरु बेला बाहिर धेरै खानुपर्छ, अहिले घरमै खान पाइएको छ, कसरी आफूलाई स्वस्थ्य राख्न सकिन्छ भन्नेमा सबैले ख्याल गर्नुपर्छ ।’